គណៈគ្រប់គ្រងជាន់ខ្ពស់

អ្នកឧកញ៉ា វេជ្ជបណ្ឌិត គួច ម៉េងលី

អ្នកឧកញ៉ាមានសញ្ជាតិខ្មែរ-អាមេរិក ជាអ្នកឯកទេសអប់រំ វេជ្ជបណ្ឌិត ជនស្នេហាជាតិ និងជាសហគ្រិនមួយរូប។ បច្ចុប្បន្ន គាត់ត្រូវគេស្គាល់ថាជា ស្ថាបនិក ប្រធានក្រុមប្រឹក្សាភិបាល និងអគ្គនាយកប្រតិបត្តិ នៃក្រុមហ៊ុន ម៉េងលី ជេ. គួច អេឌ្យូខេសិន ដែលជាស្ថាប័នផ្ដល់សេវាអប់រំឈានមុខគេនៅក្នុងប្រទេសកម្ពុជា និងមានបុត្រសម្ពន្ធគឺ មជ្ឈមណ្ឌលភាសា អេ អាយ អាយ (Aii) និងសាលារៀន    អន្ដរទ្វីប អាមេរិកាំង (AIS) ហើយលោកមានឯកទេសផ្នែក អប់រំ និងការអភិវឌ្ឍសហគមន៍ផងដែរ។ បច្ចុប្បន្ន អ្នកឧកញ៉ាមានតំណែងជា សមាជិកទីប្រឹក្សា និងជាអនុប្រធានក្រុមការងារផ្នែកអប់រំ នៃសភាពាណិជ្ជកម្មកម្ពុជា, ទីប្រឹក្សាកិត្តិយស នៃសមាគមសហគ្រិនស្រ្តីកម្ពុជា, សមាជិកក្រុមប្រឹក្សាភិបាល នៃវិទ្យាស្ថានខ្មែរសម្រាប់សហប្រតិបត្តិការ និងសន្តិភាព, សមាជិកស្ថាបនិក និងទីប្រឹក្សា នៃក្លិបអ្នកវិនិយោគកម្ពុជា, ទីប្រឹក្សាក្រុមប្រឹក្សាភិបាល នៃសហព័ន្ធសេវាអប់រំនៅកម្ពុជា, ស្ថាបនិក និងប្រធានក្រុមប្រឹក្សាភិបាល​ នៃគ្រឹះស្ថានមីក្រូហិរញ្ញវត្ថុ ប្រសិទ្ធភាព ហ្វាយនែន និងស្ថាបនិក ប្រធានក្រុមប្រឹក្សាភិបាល និងចាងហ្វាងនៃអឹម ជេ ឃ្យូ មេឌា ណេតវើក។

អ្នកឧកញ៉ា វេជ្ជបណ្ឌិត គួច ម៉េងលី មានស្រុកកំណើតនៅខេត្តបាត់ដំបង។ អ្នកឧកញ៉ា បានសិក្សានៅសាកលវិទ្យាល័យ University of California at Berkeley សហរដ្ឋអាមេរិក ជាកន្លែងដែលលោកបានបញ្ចប់ការសិក្សាផ្នែក Pre-Med Studies នៅឆ្នាំ១៩៩១។ បន្ទាប់មក លោកបានបញ្ចប់ការសិក្សាពីសាកលវិទ្យាល័យ Spartan Health Sciences នៃរដ្ឋ New Mexico សហរដ្ឋអាមេរិក ក្នុងឆ្នាំ១៩៩៨ ដោយទទួលបាន​សញ្ញាបត្រវេជ្ជបណ្ឌិតវេជ្ជសាស្ត្រ ជំនាញវេជ្ជសាស្រ្តទូទៅ។ ក្នុងឆ្នាំ២០០៧ អ្នកឧកញ៉ា ទទួលបានសញ្ញាបត្រអនុបណ្ឌិត ផ្នែកសុខភាពសាធារណៈ​​ ពីសាកលវិទ្យាល័យ Massachusetts ទីក្រុង Amherst សហរដ្ឋអាមេរិក។

អ្នកឧកញ៉ា បានធ្វើការជាសាស្ត្រាចារ្យវិទ្យាសាស្រ្ត បង្រៀននៅដេប៉ាតឺម៉ង់ វិទ្យាសាស្ត្រស្តីពីរូបរាងកាយ និងជីវិត នៃមហាវិទ្យាល័យ Cleveland Chiropractic ក្នុងទីក្រុង Los Angeles រដ្ឋ California មុនពេលដែលអ្នកឧកញ៉ាវិលត្រឡប់មកកាន់​ប្រទេសកម្ពុជាវិញ​ក្នុងឆ្នាំ២០០២ ក្នុងនាមជាពេទ្យស្ម័គ្រចិត្ត មានតួនាទីជាទីប្រឹក្សាយោបល់នៃគម្រោង សមាហរណកម្មការគ្រប់គ្រងជំងឺកុមារ (Integrated Management of Childhood Illness, IMCI) និងសុខភាពសាធារណៈ​របស់អង្គការ ដៃគូដើម្បីអភិវឌ្ឍន៍ “Partners for Development” ដែលមានមូលដ្ឋាននៅរដ្ឋ Maryland សហរដ្ឋអាមេរិក។ ក្រោយមក អ្នកឧកញ៉ាបានកាន់តំណែងជាសាស្ត្រាចារ្យ ផ្នែកវិទ្យាសាស្ត្រសុខាភិបាល នៃមហាវិទ្យាល័យ គណិតសាស្រ្ត វិទ្យាសាស្រ្ត និងវិស្វកម្ម នៅសាកលវិទ្យាល័យបញ្ញាសាស្រ្តកម្ពុជា ពីឆ្នាំ២០០៣ ដល់ឆ្នាំ២០០៤ ហើយលោកក៏ទទួលបានការតែងតាំងជា ស្ថាបនិកព្រឹទ្ធបុរស អនុប្រធានគណៈកម្មការអប់រំ និងក៏ជាសាស្រ្តាចារ្យ ផ្នែកសុខភាពសាធារណៈ នៃមហាវិទ្យាល័យសុខភាពសាធារណៈ នៅសាកលវិទ្យាល័យកម្ពុជា​ មុនពេលលោកបង្កើត ក្រុមហ៊ុន ម៉េងលី ជេ. គួច អេឌ្យូខេសិន នាឆ្នាំ២០០៥។​

អ្នកឧកញ៉ា​ ត្រូវគេទទួលស្គាល់ចំពោះការចូលរួមយ៉ាងសកម្មរបស់លោកក្នុងកិច្ចការងារមនុស្ស​ធម៌ ការអភិវឌ្ឍសហគមន៍ តាមរយៈការខិតខំប្រឹងប្រែងរបស់លោកក្នុងវិស័យអប់រំ វិស័យសុខាភិបាល និងការបម្រើសេវាសង្គម ក្នុងតួនាទីជានាយកប្រតិបត្តិនៃ មូលនិធិ ម៉េងលី ជេ. គួច ដែលបង្កើតឡើងក្នុងឆ្នាំ​២០០៥។

ពានរង្វាន់កិត្តិយសចុងក្រោយ ដែលអ្នកឧកញ៉ាទទួលបាន មានដូចខាងក្រោម៖

• ឧកញ៉ាមនុស្សធម៌ប្រចាំឆ្នាំ២០១៨ នៅ​ក្នុងគេហទំព័រព័ត៌មាន​អនឡាញ Sabay News, ព្រះរាជាណាចក្រកម្ពុជា ក្នុង​ឆ្នាំ២០១៨
• សប្បុរសជនដ៏អស្ចារ្យទាំង៥ ប្រចាំឆ្នាំ២០១៧ នៅ​ក្នុងគេហទំព័រព័ត៌មាន​អនឡាញ Sabay News, ព្រះរាជាណាចក្រកម្ពុជាឆ្នាំ២០១៧
• អ្នកដឹកនាំអាជីវកម្មឆ្នើមប្រចាំឆ្នាំ២០១៦ នៅ​ក្នុង​ទស្សនាវដ្ដីពាណិជ្ជកម្មកម្ពុជា, ចេញផ្សាយ ខែធ្នូ ឆ្នាំ២០១៦
• អ្នកដឹកនាំអាជីវកម្មឆ្នើមប្រចាំឆ្នាំ២០១៥ នៅ​ក្នុងទស្សនាវដ្ដីពាណិជ្ជកម្មកម្ពុជា, ចេញផ្សាយ ខែធ្នូ ឆ្នាំ២០១៥
• សប្បុរសជនដ៏អស្ចារ្យទាំង៥ ប្រចាំឆ្នាំ២០១៥ នៅ​ក្នុងគេហទំព័រព័ត៌មាន​អនឡាញ Sabay News, ព្រះរាជាណាចក្រកម្ពុជា ក្នុង​ឆ្នាំ២០១៥
• ពានរង្វាន់អ្នកដឹកនាំឆ្នើមក្នុងនាមជាដៃគូអប់រំ ប្រគល់ដោយសមាគម Worlddidac ក្នុងសន្និសីទថ្នាក់តំបន់អាស៊ីរបស់ Worlddidac ប្រចាំឆ្នាំ២០១៥,​​ក្រុងហុងកុង, ឆ្នាំ២០១៥ ប្រគល់ជូនដោយ នាយករដ្ឋមន្ត្រីអូស្ត្រាលី ទី២៧ គឺលោកស្រី Julia Gillard
• បណ្ណកិត្តិយស ឧត្ដមភាពនៃ​ជោគជ័យដ៏ប្រសើរក្នុងការអប់រំ និងអភិវឌ្ឍន៍យុវជន, យុវតារា កម្ពុជា, ព្រះរាជាណាចក្រកម្ពុជា, ឆ្នាំ២០១៣
• យុវជនជនជាតិចិននៅបរទេសឆ្នើមប្រចាំឆ្នាំ ប្រគល់ជូនដោយការិយាល័យកិច្ចការបរទេសចិននៃក្រុមប្រឹក្សារដ្ឋនៃសាធារណៈរដ្ឋប្រជាមាណិតចិន, ឆ្នាំ២០០៨

ស្នាដៃសៀវភៅ

1. «កម្រងកំណាព្យពីដួងចិត្ត» បោះពុម្ពដោយ គ្រឹះស្ថានបោះពុម្ព នៃសាកលវិទ្យាល័យ ម៉េងលី ជេ. គួច, វិច្ឆិកា, ឆ្នាំ២០២០
2. «បណ្ដុំទស្សនៈ» បោះពុម្ពដោយ គ្រឹះស្ថានបោះពុម្ព នៃសាកលវិទ្យាល័យ ម៉េងលី ជេ. គួច, មិថុនា, ឆ្នាំ២០២០
3. «គំនិតរកស៊ី គួច ម៉េងលី» បោះពុម្ពដោយ គ្រឹះស្ថានបោះពុម្ព នៃសាកលវិទ្យាល័យ ម៉េងលី ជេ. គួច, ខែមីនា, ឆ្នាំ២០១៩
4. «១០៨ ចក្ខុវិស័យ គួច ម៉េងលី» បោះពុម្ពដោយ គ្រឹះស្ថានបោះពុម្ព នៃសាកលវិទ្យាល័យ ម៉េងលី ជេ. គួច, ខែតុលា, ឆ្នាំ២០១៨
5. «ភ្នំដងរែក ទីពុំអាចភ្លេច» បោះពុម្ពដោយ គ្រឹះស្ថានបោះពុម្ព នៃសាកលវិទ្យាល័យ ម៉េងលី ជេ. គួច, ខែឧសភា, ឆ្នាំ២០១៨
6. «អ្នកជាមនុស្សល្អ ល្អប្រសើរ និងល្អអស្ចារ្យ» បោះពុម្ពដោយ គ្រឹះស្ថានបោះពុម្ព នៃសាកលវិទ្យាល័យ ម៉េងលី ជេ. គួច, ខែវិច្ឆិកា, ឆ្នាំ២០១៦
7. «ទស្សនៈអាជីវកម្ម» បោះពុម្ពដោយ គ្រឹះស្ថានបោះពុម្ព នៃសាកលវិទ្យាល័យ ម៉េងលី ជេ. គួច, ខែវិច្ឆិកា, ឆ្នាំ២០១៦
8. «ជំនួបតុកាហ្វេ រវាង ដុកទ័រ ម៉េងលី និងខ្ញុំ» បោះពុម្ពដោយ គ្រឹះស្ថានបោះពុម្ព នៃសាកលវិទ្យា ល័យ ម៉េងលី ជេ. គួច, ខែសីហា, ឆ្នាំ២០១៦

ស្នាដៃនិពន្ធដោយអ្នកដទៃ

1. «កម្រងរឿងខ្លី ឧកញ៉ា វេជ្ជបណ្ឌិត គួច ម៉េងលី និមិត្តរូបខ្ញុំ» បោះពុម្ពដោយ គ្រឹះស្ថានបោះពុម្ព នៃសាកលវិទ្យាល័យ ម៉េងលី ជេ. គួច, ខែមករា, ឆ្នាំ២០២០
2. «កម្រងកំណាព្យ វេជ្ជបណ្ឌិត គួច ម៉េងលី និងខ្ញុំ» បោះពុម្ពដោយ គ្រឹះស្ថានបោះពុម្ព នៃសាកលវិទ្យាល័យ ម៉េងលី ជេ. គួច, ខែសីហា, ឆ្នាំ២០១៩
3. «ពេលមួយដែលខ្ញុំស្គាល់ ដុកទ័រ គួច ម៉េងលី» បោះពុម្ពដោយ គ្រឹះស្ថានបោះពុម្ព នៃសាកលវិទ្យាល័យ ម៉េងលី ជេ. គួច, ខែសីហា, ឆ្នាំ២០១៩

អានបន្ថែម

សំណើអញ្ជើញ អ្នកឧកញ៉ា វេជ្ជបណ្ឌិត គួច ម៉េងលី ចូលរួមជាវាគ្មិនកិត្តិយស

គួច ផល

លោក គួច ផល ជាមន្ត្រីទំនាក់ទំនងសាធារណៈរបស់ក្រុមហ៊ុន និងជាសមាជិកក្រុមប្រឹក្សាភិបាល នៃក្រុមហ៊ុន ម៉េងលី ជេ. គួច អេឌ្យូខេសិន​ ដែលមានមជ្ឈមណ្ឌលភាសា អេ អាយ អាយ និងសាលារៀន អន្តរទ្វីប អាមេរិកាំង។

ជាកូនច្បងក្នុងចំណោមបងប្អូនប្រាំបីនាក់ លោក គួច ផល កើតនៅខែ​មេសា​ ឆ្នាំ១៩៦៤ ខេត្តបាត់ដំបង ប្រទេសកម្ពុជា។ ដូចជាប្រជាជនកម្ពុជាដទៃទៀតដែរ លោក គួច ផល បានឆ្លងកាត់កុមារភាព និងយុវភាពក្នុងរបប ប៉ុល​ ពត មុនពេលដែលលោក និងក្រុមគ្រួសារបានទៅរស់នៅលើទឹកដីសហរដ្ឋអាមេរិកក្នុងខែមេសា ឆ្នាំ​១៩៨៤។

មុនពេលដែលលោកចាកចេញទៅសហរដ្ឋអាមេរិកក្នុងខែមេសា ឆ្នាំ ១៩៨៤ លោក គួច ផល ធ្លាប់ប្រកបរបរអាជីវកម្ម ក៏ដូចជាធ្វើការ និង​ការងារស័្មគ្រចិត្តជាច្រើន។ នៅពេលដែលកំពុងសិក្សានៅវិទ្យាល័យក្នុងខេត្តបាត់ដំបង លោក គួច ផល បានបង្កើតអាជីវកម្មមួយ​គឺ​ការនាំទំនិញចូលមកពីប្រទេសថៃមកលក់នៅស្រុកកំណើត និងរាជធានីភ្នំពេញ។ ក្រោយមកទៀត នៅជំរំជនភៀសខ្លួន ខាវអីដាង នៅក្នុងខែឧសភា ឆ្នាំ១៩៨២ លោកបានធ្វើការនៅមណ្ឌលជួយសង្គ្រោះអន្តរជាតិ (International Rescue Center, IRC) ជាជំនួយការមន្ទីរពិសោធន៍ផ្នែកវិភាគទឹកនោម ប៉ារ៉ាស៊ីតវិទ្យា និងមីក្រូទស្សន៍។

លោកធ្វើការនៅមណ្ឌលជួយសង្គ្រោះអន្តរជាតិរហូតដល់ខែមេសា ឆ្នាំ១៩៨៣ ហើយក្នុងខែមេសាដដែលនោះដែរ លោកទទួលបានការងាររបស់រដ្ឋាភិបាលអាមេរិក ជាអ្នកបកប្រែភាសារបស់ទីភ្នាក់ងារអ្នកស័្មគ្រចិត្ត (JVA)​ រយៈពេលប្រាំមួយខែ​។ នៅក្នុងខែតុលា ឆ្នាំ១៩៨៣ គ្រួសារបស់លោក ផល គួច បានជាប់ការសម្ភាសទៅរស់នៅសហរដ្ឋអាមេរិក និងបានផ្ទេរមករស់នៅជំរំបណ្ដោះអាសន្នឈុនបុរីប្រហែលពីរសប្ដាហ៍ មុនពេលដែលផ្ទេរទៅកាន់ជំរំជនភៀសខ្លួនក្នុងប្រទេសហ្វីលីពីនដែលមានឈ្មោះថា PNRC Philippine Refugee Center។ រយៈពេលប្រាំមួយខែនៅជំរំជនភៀសខ្លួនសាអាន បាត៉ាអាន ប្រទេសហ្វីលីពីន លោកបានធ្វើការងារស្ម័គ្រចិត្តជាគ្រូបង្រៀនភាសាអង់គ្លេស និងអ្នកបកប្រែតម្រង់ទិសវប្បធម៌សម្រាប់ជនភៀសខ្លួនថ្មី ជាតួនាទីមួយដែលគេគោរពរាប់អានបំផុតក្នុងជំរំជនភៀសខ្លួន ។

ក្រោយពីបានមករស់នៅទឹកដីសហរដ្ឋអាមេរិក លោក គួច ផល បានសិក្សានៅមហាវិទ្យាល័យ Sourhland College ក្នុងក្រុងឡូសអានជឺឡេស និង​បញ្ចប់ការសិក្សា ទទួលបានសញ្ញាបត្រ លេខាធិការផ្នែកច្បាប់ក្នុងឆ្នាំ១៩៨៥។ លោក ផល គួច បានប្រឡងជាប់សញ្ញាបត្រដែលមានតម្លៃស្មើសញ្ញាបត្រ​វិទ្យាល័យក្នុងខែកញ្ញា ឆ្នាំ១៩៨៥ និងបន្តការសិក្សានៅមហាវិទ្យាល័យ Los Angeles Trade College និងបានបញ្ចប់បរិញ្ញាបត្ររងផ្នែកបច្ចេកវិទ្យាវិស្វកម្មអេឡិចត្រូនិចនៅក្នុងខែមិថុនា ឆ្នាំ១៩៨៧។

ក្រោយបញ្ចប់ការសិក្សា លោក គួច ផល បានធ្វើការជាអ្នកបច្ចេកទេសផ្នែកអេឡិចត្រូនិចក្នុងក្រុមហ៊ុន​ Q-tech Corporation។ ក្រោយមក នៅក្នុងខែមិថុនា ឆ្នាំ១៩៨៩ លោកក៏បានផ្លាស់ប្តូរទៅធ្វើការនៅក្រុមហ៊ុន Teledyne Control ជាអ្នកធ្វើតេស្ត និងជួសជុលទិន្នន័យហោះហើរ និងប្រអប់ខ្មៅទាំងអស់រយៈពេលប្រាំឆ្នាំ មុនពេលចាប់​ផ្តើមអាជីវកម្មផ្ទាល់ខ្លួនក្នុងឆ្នាំ១៩៩៣ ដល់បច្ចុប្បន្ន ប៉ុន្តែលោក ផល គួច បានបន្តធ្វើការនៅក្រុមហ៊ុន Teledyne Control រហូតដល់ឆ្នាំ១៩៩៤៕

គួច​ អាឡិច

លោក គួច អាឡិច ជាមន្ត្រីទំនាក់ទំនងមូលនិធិ និងជាសមាជិកក្រុមប្រឹក្សាភិបាល នៃក្រុមហ៊ុន ម៉េងលី ជេ. គួច អេឌ្យូខេសិន​ ដែលមានមជ្ឈមណ្ឌលភាសា អេ អាយ អាយ និងសាលារៀន អន្តរទ្វីប អាមេរិកាំង។

លោក គួច អាឡិច កើតនៅក្នុងឆ្នាំ ១៩៦៧​ នៅទីរួមខេត្ត បាត់ដំបង ប្រទេសកម្ពុជា។ ក្រោយមកគាត់បានទៅរស់នៅ និង​បញ្ចាប់ការសិក្សានៅសហរដ្ឋអាមេរិក។​ សព្វថ្ងៃលោករស់នៅ​ និងបម្រើការងារនៅឯ​​​​សហរដ្ឋអាមេរិក។ លោក គួច អាឡិច មានបទពិសោធជា​ច្រើនដូចជា ​អ្នកគ្រប់គ្រងរោងចក្រ សម្លៀកបំពាក់ មជ្ឈមណ្ឌលទិញទំនិញ និងហាងលក់ទំនិញផ្សេងៗ ។ នៅក្នុងឆ្នាំ១៩៨៩ លោក គួច អាឡិច បានបញ្ចប់ការសិក្សានៅមហាវិទ្យាល័យ Trade Technical College នៅទីក្រុងឡូសអានជឺលេស រដ្ឋកាលីហ្វ័រញ៉ា សហរដ្ឋអាមេរិក។ លោកមានអាជ្ញាបណ្ណអ្នកគ្រប់គ្រងផ្នែកចំណីអាហារអាជីព ​ដែលទទួលស្គាល់ដោយ National Assessment Institutes ក្រុងឡូសអានជឺលេស រដ្ឋកាលីហ្វ័រញ៉ា សហរដ្ឋអាមេរិក។ សព្វថ្ងៃគាត់គឺជាម្ចាស់ហាង 99 Cent Outlet និងហាងលក់ទំនិញរាយ នៅក្នុងទីក្រុងឡូសអានជឺលេស រដ្ឋកាលីហ្វ័រញ៉ា សហរដ្ឋអាមេរិក។

​​មុនពេលចូលបម្រើការក្នុងក្រុមហ៊ុន ម៉េងលី ជេ. គួច អេឌ្យូខេសិន លោក គួច អាឡិច ធ្លាប់បម្រើការជាអ្នកឯកទេសផ្នែកកែច្នៃមាស​​របស់ក្រុមហ៊ុន Chain and Cham Co., Ltd នៅក្នុងទីក្រុងឡូសអានជឺលេស រដ្ឋកាលីហ្វ័រញ៉ា សហរដ្ឋអាមេរិក។ នៅក្នុងឆ្នាំ១៩៩១​ លោកបានបង្កើតអាជីវកម្មផ្ទាល់ខ្លួន​រួមមាន A & Q Fashion, Donut King, Super Mercado San Carlos,​ Daily Donut និង 99 Cent Outlet។ មិនត្រឹមតែប៉ុននោះ​ គាត់ក៏ជាសហម្ចាស់កម្មសិទ្ធហាងជាច្រើនរួមមាន​ House Of donuts និង S & A​ One Dollar Store ក្នុងសហរដ្ឋអាមេរិក។​ ក្រៅពីនេះ លោកក៏ជាសមាជិកនៃគណៈកម្មការសភាគណបក្សសាធារណរដ្ឋ នៃរដ្ឋវ៉ាស៊ីងតុន ឌីសី សហរដ្ឋអាមេរិក ចាប់ពីឆ្នាំ ២០០៦ និងជាសមាជិកនៃ​សភាពាណិជ្ជកម្មរដ្ឋកាលីហ្វ័រញ៉ា សហរដ្ឋអាមេរិក ចាប់ពីឆ្នាំ ១៩៩៣ មក។

សួង ចន្ថាត

លោក សួង ចន្ថាត បានចូលបម្រើការងារនៅក្រុមហ៊ុន ម៉េងលី ជេ. គួច អេឌ្យូខេសិន ក្នុងឆ្នាំ ២០០៥ ជាមន្រ្តីផ្នែកលក់និងទីផ្សារ។ បន្ទាប់មកលោកត្រូវបានតំឡើងតួនាទី ជាជំនួយការអគ្គលេខាធិការសិក្សានៅឆ្នាំ ២០០៩ ប្រធានប្រវត្តិសាលា និងជំនួយការប្រធានការិយាល័យសិក្សានៅឆ្នាំ ២០០៩ ស្មៀនជាន់ខ្ពស់ឆ្នាំ ២០១៦ និងជំនួយការផ្ទាល់ខ្លួនដល់ស្ថាបនិកប្រធាននិងនាយកប្រតិបត្តិនៅឆ្នាំ ២០១៧ ។

ជាមួយនឹងចំណេះដឹង បទពិសោធន៍ និងភាពល្អិតល្អន់ គាត់បានតំឡើងតួនាទី ជានាយករងប្រតិបត្ដិប្រតិការនៅឆ្នាំ ២០១៨។ បច្ចុប្បន្ន លោកមានតួនាទីជា ជំនួយការផ្ទាល់ ស្ថាបនិក ប្រធានក្រុមប្រឹក្សាភិបាល និងអគ្គនាយកប្រតិបត្តិ សម្រាប់ប្រតិបត្តិការ ដែលតួនាទីនេះ គឺស្មើនឹង នាយកប្រតិបត្តិការ។ លោកក៏ទទួលខុសត្រូវលើការងារច្បាប់ ការដោះស្រាយបញ្ហា និងវិវាទរបស់បុគ្គលិកផងដែរ។

លោកបានទទួលបរិញ្ញាបត្ររដ្ឋបាលអាជីវកម្ម ផ្នែកគណនេយ្យនៅឆ្នាំ ២០០៧ និងបានចូលរួមវគ្គបណ្តុះបណ្តាលជាច្រើនអំពីសេវាកម្មអតិថិជន ទីផ្សារយុទ្ធសាស្រ្តរដ្ឋបាលហិរញ្ញវត្ថុ និងធនាគារ៕

ឡាយ​ ​សុភា

លោក​ ​ឡាយ​ ​សុភា​ ​បាន​ចូល​បម្រើ​ការងារ​ក្នុង​មជ្ឈមណ្ឌល​​ភាសា​ ​អេ​ ​អាយ​ ​អាយ​ ​តាំង​ពី​ឆ្នាំ២០០៦​ ដែល​នៅ​ពេលនេះ​លោក​ជា​គ្រូ​បង្រៀន​ភាសា​អង់គ្លេស​ក្រៅម៉ោង។​ ​ចាប់​តាំង​ពី​បម្រើ​ការងារ​ ក្នុង​មជ្ឈមណ្ឌល​ភាសា​ ​អេ​ ​អាយ​ ​អាយ​ ​មក​ ​លោក​ត្រូវ​បាន​គេ​តំឡើង​តួនាទី​ច្រើន​ ដូច​ជា​ពី​គ្រូ​ភាសា​អង់គ្លេស​ក្រៅ​ម៉ោង​ ​ទៅ​គ្រូ​ភាសា​អង់គ្លេស​ពេញម៉ោង​ ​ពី​មន្ត្រី​ទំនាក់ទំនង​អន្តរជាតិ​ ​និងមន្ត្រី​រដ្ឋបាល​ TOEFL​ ​ទៅ​អនុប្រធាន​ ​សម្រប​សម្រួល​កម្មវិធី​សិក្សា​ ពី​ជា​អនុប្រធាន​ក្រុមប្រឹក្សាភិបាល​សម្រាប់​កិច្ចការ​អប់រំ​ ​ទៅ​នាយក​សាខា​នៃ​មជ្ឈមណ្ឌល​ភាសា​ ​អេ​ ​អាយ​ ​អាយ​ ​សាខា​ទួលគោក​ ពី​នាយក​សាខា​នៃ​មជ្ឈមណ្ឌល​ភាសា​ ​អេ​ ​អាយ​ ​អាយ​ ​សាខា​ទួលគោក​ ទៅ​ជា​អនុប្រធាន​ ​និងចុងក្រោយ​នេះ​ជាប្រធានមជ្ឈមណ្ឌល​​ភាសា​ ​អេ​ ​អាយ​ ​អាយ​ ​នា​ពេល​បច្ចុប្បន្ន​នេះ។​

លោក​ ​សុភា​ ​មាន​បទ​ពិសោធន៍​ក្នុង​វិស័យ​អប់រំ​ជា​ប្រធាន​កម្មវិធី​សិក្សា​ចាប់តាំង​ពី​ឆ្នាំ២០០១​ មក​ម្ល៉េះ។​ ​ក្នុង​នាម​ជា​ប្រធាន​កម្មវិធី​សិក្សា​ម្នាក់​ ​គាត់​ទទួល​ខុសត្រូវ​ក្នុងការ​ដឹកនាំ​សាលា​ទាំងមូល។​ គាត់​ទទួល​ជោគជ័យ​ក្នុងការ​បង្កើត​ ​កម្មវិធី​ផ្លាស់ប្តូរ​បទពិសោធន៍​សិក្សា​នៅ​មហា​វិទ្យាល័យ​ Chichester​ ​ក្នុង​ចក្រភព​អង់គ្លេស​ ​គាត់​ជា​មេ​ប្រយោគ​សម្រាប់​ការ​ប្រឡង​ ​the​ ​Cambridge​ ​ESOL​ និងបាន​បង្កើត​មជ្ឈមណ្ឌល​ ​ធ្វើ​តេស្ត​ដែល​មាន​ការ​ទទួលស្គាល់​ ​សម្រាប់​ការ​ប្រឡង​ ​Anglia​ Examination​ ​Syndicate​ ​និង​ ​TOEFL​ ​iBT។​

គាត់​បាន​ទៅ​រស់នៅ​សហរដ្ឋ​អាមេរិក​ និង​ទទួល​បាន​ការ​អប់រំ​នៅ​ទីនោះ​តាំងតែ​ពី​គាត់​អាយុ២ឆ្នាំ​មកម្ល៉េះ។​ ​បច្ចុប្បន្ន​នេះ​គាត់​រស់​នៅ​ក្នុង​រាជធានី​ភ្នំពេញ​ជាមួយ​គ្រួសារ​របស់​គាត់។​

រស់ យ៉ាណា

លោកស្រី រស់ យ៉ាណា កើតនៅថ្ងៃទី០៥ ខែមីនា ឆ្នាំ១៩៨១ ​នៅ​រាជធានីភ្នំពេញ។ លោកស្រីទទួល​បានសញ្ញាបត្រមធ្យមសិក្សាគរុកោសល្យ នៃសាលាគរុកោសល្យ និងវិក្រិតការរាជធានីភ្នំពេញនៅក្នុង​ឆ្នាំ២០០១។ នៅឆ្នាំ​២០០១ នោះ​ដែរលោកស្រីបានចេញទៅបម្រើការងារជាគ្រូបង្រៀននៅ​សាលា​បឋម​សិក្សាសាធារណៈ ហើយក៏បានបន្តការសិក្សាថ្នាក់​បរិញ្ញាបត្រផ្នែកគ្រង់គ្រង នៅសាកលវិទ្យាល័យជាតិ​គ្រប់គ្រង។

លោកស្រី រស់ យ៉ាណា បានចូល​បម្រើការងារនៅសាលារៀន អន្ដរទ្វីប អាមេរិកាំង នៅថ្ងៃទី១០ ខែតុលា ឆ្នាំ២០០៥ ក្នុងតួនាទីជា​គ្រូបង្រៀនពេញម៉ោង។ ដោយ​យោង​ទៅលើសមត្ថភាពការងារ ការខិតខំប្រឹង​ប្រែង និងភាពតស៊ូអត់ធ្មត់ក្នុងការ​បំពេញការងារជូនសាលារៀន អន្ដរទ្វីប អាមេរិកាំង លោកស្រីទទួលបាន​ការដំឡើងតួនាទីជាបន្ដបន្ទាប់។ នៅក្នុងឆ្នាំ២០០៦ លោកស្រីត្រូវ​បាន​ដំឡើងតួនាទីពីគ្រូបង្រៀន​បឋម​សិក្សា ទៅជាចាងហ្វាងរងផ្នែក​មត្តេយ្យ និងបឋម​សិក្សា។ ដោយសារ​សមត្ថភាព​ដឹកនាំល្អ​របស់លោកស្រី​ចំពោះ​ស្ថាប័ន នៅថ្ងៃទី០១ ខែមីនា ឆ្នាំ២០១៧ លោកស្រីត្រូវបានដំឡើងតួនាទីជា អនុប្រធានសាលារៀន អន្តរទ្វីប អាមេរិកាំង ហើយក្លាយជាប្រធាន នៃសាលារៀន អន្តរទ្វីប អាមេរិកាំង នាថ្ងៃទី៣០ ខែមិថុនា ឆ្នាំ២០១៨ រហូតដល់បច្ចុប្បន្ន។

លោកស្រី រស់ យ៉ាណា បានពេញការងារយ៉ាងល្អប្រសើរជូនស្ថាប័នអស់រយៈពេលជាង​មួយទស្សវត្សរ៍​កន្លង​មកនេះ។ លោកស្រី គឺជាថ្នាក់ដឹកនាំមួយរូបដែលមានការប្តេជ្ញាចិត្តខ្ពស់ពោរពេញដោយ​គំនិត​ច្នៃប្រឌិត ប្រកបដោយ​ក្រមសីមធម៌វិជ្ជាជីវៈក្នុងការបំពេញការងារ។ សាលារៀនមានការកោតសរសើរ​យ៉ាង​ស្មោះ​ចំពោះ​លោកស្រី ដែលលោកស្រីមានការលះបង់ខ្ពស់ និងខិតខំអស់ពីកម្លាំងកាយចិត្តបំពេញ​ការងារ ដែល​បានរួម​ចំណែកយ៉ាងសំខាន់ក្នុងការអភិវឌ្ឍស្ថាប័នឱ្យទទួលបានជោគជ័យ រហូតមកដល់​បច្ចុប្បន្ននេះ៕

វង្ស សុវណ្ណារ័ត្ន

លោក វង្ស​ សុវណ្ណារ័ត្ន ត្រូវបានតែងតាំងជានាយករដ្ឋបាល ក្នុងឆ្នាំ២០១១ ជាមួយនឹងតួនាទីនេះគាត់មានភារកិច្ចក្នុងការគ្រប់គ្រងលើកិច្ចការដ្ឋបាលទាំងស្រុង និងជួយចាត់​ចែងការងារតាមការិយាល័យផ្សេងៗ ដែលស្ថិតក្រោមផ្នែករដ្ឋបាលគឺ ការិយាល័យរដ្ឋបាល ការិយាល័យផ្តល់ព័ត៌មាន បណ្ណសារដ្ឋាន បណ្ណាល័យ ម៉េងលី ជេ. គួច ឃ្លាំង ម៉េងលី ជេ. គួច អេឌ្យូខេសិន និង​ការិយាល័យ​កិច្ចការសិស្ស ផងដែរ។

លោក វង្ស សុវណ្ណារ័ត្ន បានចូលបម្រើការងារនៅក្រុមហ៊ុន ម៉េងលី ជេ. គួច អេឌ្យូខេសិន ក្នុងឆ្នាំ២០០៧ ជាមន្រ្តីរដ្ឋបាល។ គាត់បានតែងតាំងជានាយករងរដ្ឋបាល ក្នុងឆ្នាំ២០០៩។

បើនិយាយពីការសិក្សាវិញ លោក វង្ស សុវណ្ណារ័ត្ន បានទទួលសញ្ញាបត្របរិញ្ញាបត្រជំនាញនីតិសាស្ត្រ ពីសាកលវិទ្យាល័យភូមិន្ទនីតិសាស្ត្រ និងវិទ្យាសាស្រ្តសេដ្ឋកិច្ច នៃព្រះរាជាណាចក្រកម្ពុជា៕

សាវ៉េត ញាណបញ្ញា

លោក សាវ៉េត ញាណបញ្ញា បានបញ្ចប់បរិញ្ញាបត្រផ្នែកហិរញ្ញវត្ថុ និងធនាគារពីសាកលវិទ្យាល័យកម្ពុជា។ នៅក្នុងឆ្នាំ ២០១៣ លោកបានទទួលអាហារូបករណ៍ពីក្រសួងសេដ្ឋកិច្ច និងហិរញ្ញវត្ថុ ដើម្បីសិក្សាកម្មវិធី ACCA នៅវិទ្យាស្ថាន CamEd។ ដោយមានគុណវុឌ្ឍិល្អនៅក្នុងការសិក្សា  ក្នុងឆ្នាំ ២០១៣ លោកបានចាប់ផ្តើមអាជីពដំបូង ជាសវនករនៅក្នុងក្រុមហ៊ុន PricewaterhouseCoopers Cambodia (PwC) ដែលជាក្រុមហ៊ុនសវនកម្មធំមួយក្នុងចំណោមក្រុមហ៊ុនសវនកម្មធំៗទាំងបួននៅលើពិភពលោក។ ក្នុងអំឡុងពេលធ្វើការជាមួយក្រុមហ៊ុន PwC លោកទទួលបានបទពិសោធន៍ និងបង្កើនចំណេះដឹងយ៉ាងច្រើនទៅលើការងារសវនកម្ម ស្ទើរតែគ្រប់វិស័យ ដែលក្នុងនោះមានដូចជា ក្រុមហ៊ុនសាជីវកម្ម ធនាគារ មីក្រូហិរញ្ញវត្ថុ រោងចក្រផលិតកម្ម អង្គការមិនមែនរដ្ឋាភិបាល ។ល។

លោកបានចូលបម្រើការងារនៅក្រុមហ៊ុន ម៉េងលី ជេ. គួច អេឌ្យូខេសិន ក្នុងតួនាទីជា ប្រធានសវនកម្មផ្ទៃក្នុង នៅខែឧសភា ឆ្នាំ២០១៧។ នៅខែកុម្ភៈឆ្នាំ ២០១៨ លោកត្រូវបានថ្នាក់ដឹកនាំផ្ទេរតួនាទី ទៅជួយនាយកដ្ឋានហិរញ្ញវត្ថុ ដោយមានតួនាទីជាប្រធានគណនេយ្យ ហើយក្រោយមកទៀតចាប់ពីខែមករាឆ្នាំ ២០១៩ លោកត្រូវបានថ្នាក់ដឹកនាំតំឡើងតួនាទីជានាយកហិរញ្ញវត្ថុ ដោយមានទំនួលខុសត្រូវ គ្រប់គ្រងទៅលើគ្រប់ទិដ្ឋភាពហិរញ្ញវត្ថុទាំងអស់របស់ក្រុមហ៊ុនទាំងមូលរហូតមកដល់សព្វថ្ងៃ។

តាំង សំអៀង

តាំង សំអៀង បានចូលបម្រើការងារនៅក្រុមហ៊ុន ម៉េងលី ជេ គួច អេឌ្យូខេសិន ដំបូលជាប្រធានសវនកម្មផ្ទៃក្នុងផ្នែកព័ត៌មានវិទ្យា នៅខែមករា ឆ្នាំ២០១៧។ បន្ទាប់មកទៀត នៅក្នុងខែ កក្កដា ឆ្នាំ ២០១៧ គាត់ត្រូវបានតម្លើងដំណែងជាប្រធានស្តីទីផ្នែកព័ត៌មានវិទ្យា។  ហើយបច្ចុប្បន្ននេះគាត់មានតួនាទីជា នាយកផ្នែកព័ត៌មានវិទ្យា។ មុនពេលចូលបម្រើការងារក្នុងក្រុមហ៊ុន ក្រុមហ៊ុន ម៉េងលី ជេ គួច អេឌ្យូខេសិន គាត់ធ្លាប់បម្រើការងារជា ជាប្រធានផ្នែកព័ត៌មានវិទ្យា នៅក្នុងក្រុមហ៊ុនឯកជនមួយនៅទីក្រុងភ្នំពេញ។ ជាងនេះទៅទៀត គាត់ក៏ធ្លាប់បម្រើការងារជាមន្រ្តីសវនករ និងមន្រ្តីសវនករជាន់ខ្ពស់ផ្នែកព័ត៌មានវិទ្យា នៅក្នុងគ្រឹះស្ថានមីក្រូហិរញ្ញវត្ថុ អេ អឹម ខេ ផងដែរ។

ចំពោះការសិស្សារបស់គាត់វិញ គាត់ទទួលបានបរិញ្ញាបត្រផ្នែកព័ត៌មានវិទ្យាពីសាកលវិទ្យាល័យ មេគង្គកម្ពុជា និងបរិញ្ញាបត្រសេដ្ឋកិច្ចពីសាកលវិទ្យាល័យ នីតិសាស្រ្ត និងវិទ្យាសាស្រ្តសេដ្ឋកិច្ច នៅទីក្រុងភ្នំពេញ។ ក្រៅពីបញ្ចប់បរិញ្ញាបត្រ គាត់ក៏បានបញ្ចប់វគ្គជំនាញផ្សេងៗ ដែលទាក់ទងនឹងប្រព័ន្ធសន្តិសុខ និងសវនកម្មព័ត៌មានវិទ្យា រួមមាន៖ Certified Information System Auditor (CISA), Usable Security, Information Security and Risk Management, Building an Information Risk Management, and Design and Executive of Information Security Strategy.

សេង សីហា

លោក សេង សីហា បានបញ្ចប់ការសិក្សាសញ្ញាប័ត្រផ្នែកសំណង់អភិវឌ្ឈជនបទនៃវិទ្យាស្ថានបច្ចេកទេសកម្ពុជា ក្នុងឆ្នាំ ២០០២ និង បរិញ្ញាប័ត្រផ្នែកសំណង់ស៊ីវិលនៃសកលវិទ្យាល័យបៀលប្រាយក្នុងឆ្នាំ២០០៦ ព្រមទាំងបញ្ចប់ថ្នាក់អនុបណ្ឌិត នៃផ្នែកអភិវឌ្ឈនិង គ្រប់គ្រង នៃសកលវិទ្យាល័យន័រតុន ក្នុងឆ្នាំ ២០១១ ។

លោក សេង​ សីហា មានបទពិសោធច្រើនក្នុងវិស័យសំណង់ ដោយបានចូលរួមបំរើការងារក្នុងក្រុមហ៊ុនជាច្រើនដូចជា៖

• ចាប់ពីខែ មករា ឆ្នាំ ២០០៥ ដល់ខែ កុម្ភះ ឆ្នាំ ២០០៦ លោកបានតំណែជាវិស្វករការដ្ឋាន គំរោងសាងសងស្ពានបេតុង នៅក្រុមហ៊ុន សាន់លាយគ្រុប ។
• ចាប់ពីខែ មិនា ឆ្នាំ ២០០៦ ដល់ខែ មិថុនា ឆ្នាំ ២០១០ លោកបានតំណែជាវិស្វករជំនួយការប្រធានការដ្ឋាន គំរោងសាងសងស្ពានបេតុង និងផ្លូវកៅស៊ូ នៅក្រុមហ៊ុន ថៃមៅគ្រុប ។
• ចាប់ពីខែ កក្កដា ឆ្នាំ ២០១០ ដល់ខែ វិច្ចិកា ឆ្នាំ ២០១២ លោកបានតំណែជាវិស្វករស្ពាន-ផ្លូវ និងអាគារ គំរោងសាងសងស្ពានបេតុង ផ្លូវកៅស៊ូ និងអាគារស្នាក់នៅកំពស់ប្រាំបីជាន់ នៅក្រុមហ៊ុន មេហ្គាអាសិតគ្រុប ។
• ចាប់ពីខែ ធ្នូរ ឆ្នាំ ២០១២ ដល់ខែ ឧសភា ឆ្នាំ ២០១៤ លោកបានតំណែជាប្រធានគ្រប់គ្រងសំណង់ គំរោងសាងសង ផ្លូវបេតុង រោងចក្រ និងអាគារស្នាក់ប្រភេទប្រណិតកំពស់ប្រាំបីជាន់ នៅក្រុមហ៊ុន អិល ស៊ី អេច គ្រុប ។
• ចាប់ពីខែ មិថុនា ឆ្នាំ ២០១៤ ដល់ខែ តុលា ឆ្នាំ ២០១៤ លោកបានតំណែជាវិស្វករសំណង់ស៊ីវិល គំរោងសាងសងប្រព័ន្ធទឹកស្អាតក្នុងប្រទេស កេយ៉ា នៅក្រុមហ៊ុន តូនអ៊ីនជិនាគ្រុប ។
• ចាប់ពីខែ វិច្ជិកា ឆ្នាំ ២០១៤ ដល់ខែ វិច្ចិកា ឆ្នាំ ២០១៥ លោកបានតំណែជាប្រធានគំរោង នៅក្រុមហ៊ុន វិមានជ័យគ្រុប លើគំរោងសាងសង់ផ្លូវរទេះភ្លើង និង អាគារ។
• ចាប់ពីខែ ធ្នូរ ឆ្នាំ ២០១៥ ដល់ខែ ឧសភា ឆ្នាំ ២០១៨ លោកបានតំណែជាប្រធានគ្រប់គ្រងសំណងលើគំរោងអាគារស្នាក់នៅ និង សណ្ឋាគារកំពស់ ១៦ ជាន់ និង ២៥ជាន់ នៅក្រុមហ៊ុន ឃីងស្លេនគ្រុប ។

ហើយចុងក្រោយនេះ លោកបានចូលបំរើការងារក្នុងក្រុមហ៊ុន ម៉េងលី ជេ. គួច អេឌ្យូខេសិន​ ចាប់តាំងពីខែ ឧសភា ឆ្នាំ ២០១៨​ ដល់បច្ចុប្បន្ន ជាប្រធានគំរោងសាងសង់ និងរចនា ។ ទទឹមនឹងនេះដែរក្នុងខែវិច្ជការ ឆ្នាំ ២០១៨ លោក សេង សីហា ក៏ត្រូវបានដំឡើងតួនាទីទៅជា នាយកសាងសង់​ និងរចនា រហូតដល់បច្ចុប្បន្ន។

សុង ចរិយា

លោកស្រី សុង ចរិយា ចូលបំពេញការងារនៅក្រុមហ៊ុន ម៉េងលី ជេ. គួចអេឌ្យូខេសិននៅខែវិច្ឆិកា ឆ្នាំ២០១៦ ក្នុងតួនាទីជាប្រធានគ្រប់គ្រងផ្នែកជ្រើសរើសបុគ្គលិក លុះនៅឆ្នាំ២០១៨ លោកស្រីត្រូវបានផ្តល់ឱកាស និងដំឡើងតួនាទីទៅជាប្រធានផ្នែកធនធានមនុស្ស មានទំនួលខុសត្រូវមើលលើផ្នែកធនធានមនុស្សទាំងស្រុង។ លោកស្រីមានបទពិសោធន៍ជាង១០ឆ្នាំនៅក្នុងវិស៍យខុសៗគ្នាដូថជា មន្ត្រីធនធានមនុស្ស ប្រធានក្រុមផ្នែកលទ្ធកម្មុំនៅក្នុងវិស័យរោងចក្រ មន្រ្តីធនធានមនុស្សនិងទំនាក់ទំនងផ្ទៃក្នុងនៅក្នុងវិស័យម្ហូប អាហារ និងអ្នកជំនាញផ្នែកធនធានមនុស្សជាន់ខ្ពស់នៅក្នុងវិស័យទូរគមនាគមន៍។

លោកស្រីទទួលបានបរិញ្ញាបត្រអប់រំបង្រៀនភាសាអង់គ្លេសពីសាកលវិទ្យាល័យបៀលប្រាយនិងបានបញ្ចប់ថ្នាក់អនុបណ្ឌិតផ្នែកធុរកិច្ចទូទៅពីសាកលវិទ្យាល័យបៀលប្រាយផងដែល៕

វង្ស សុភ័ក្រ

លោក វង្ស សុភ័ក្រ ជាប្រធានគ្រប់គ្រងប្រតិបត្តិការ បណ្ណាគារ អន្តរទ្វីប នៃក្រុមហ៊ុន ម៉េងលី ជេ.​ គួច អេឌ្យូខេសិន។ ស្ថិតក្នុងមុខតំណែងនេះ គាត់មានភារកិច្ច ដឹកនាំ និងសម្របសម្រួលប្រតិបត្តិការរបស់ក្រុមហ៊ុន​ និងទទួលខុសត្រូវក្នុងការធ្វើឱ្យប្រសើរឡើងនូវការអនុវត្តការងារប្រកបដោយប្រសិទ្ធភាពខ្ពស់ និងបង្កើនប្រាក់ចំណេញឱ្យក្រុមហ៊ុនតាមរយៈការចូលរួមអនុវត្តតាមផែនការយុទ្ធសាស្រ្តរបស់ក្រុមហ៊ុន។ គាត់រាយការណ៍ដោយផ្ទាល់ទៅស្ថាបនិក ប្រធានក្រុមប្រឹក្សាភិបាល និងអគ្គនាយកប្រតិបត្តិ។

លោក វង្ស សុភ័ក្រ បាន​ចាប់ផ្តើម​ការងារ​នៅ​ក្រុមហ៊ុន ម៉េងលី ជេ. គួច អេឌ្យូខេសិន នៅក្នុង​​ឆ្នាំ២០១១ ក្នុងតួនាទីជាមន្រ្តីការិយាល័យកិច្ចការសិស្ស​ ក្រោយមកលោកត្រូវបានតែងតាំងជាមន្រ្តីផ្នែកធនធានមនុស្សនៅក្នុងឆ្នាំ២០១៤ ហើយក៏ត្រូវបានតែងតាំងជាជាលេខាប្រតិបត្តិការិយាល័យស្ថាបនិក ប្រធានក្រុមប្រឹក្សាភិបាល និងអគ្គនាយកប្រតិបត្តិ នៅក្នុងឆ្នាំដដែលផងដែរ។ ​នៅក្នុងឆ្នាំ២០១៥ លោកត្រូវបាន​​​​ដំឡើងតួនាទី​ទៅជា​លេខាប្រតិបត្តិ​អគ្គនាយករដ្ឋបាល ហើយបន្ទាប់មកត្រូវបានដំឡើងតួនាទីជាប្រធានរដ្ឋបាលនៅក្នុងឆ្នាំ២០១៦។ នៅក្នុងឆ្នាំ២០១៨ លោកត្រូវបានដំឡើងតួនាទីជានាយកប្រតិបត្តិការ នៃក្រុមហ៊ុនម៉េងលី ជេ.​ គួច អេឌ្យូខេសិន ហើយលោកក៏ត្រូវបានតែងតាំងជាជំនួយការផ្ទាល់ស្ថាបនិកប្រធានក្រុមប្រឹក្សាភិបាល និងអគ្គនាយកប្រតិបត្តិ ផងដែរ នៅក្នុងខែមេសា ឆ្នាំ២០២០។ លោក វង្ស សុភ័ក្រ កាន់តួនាទីជាប្រធានប្រតិបត្តិការ នៃបណ្ណាគារ អន្តរទ្វីប តាំងពីដើមឆ្នាំ២០២១ រហូតមកដល់ពេលបច្ចុប្បន្ន។

លោកបានបញ្ចប់​ថ្នាក់​បរិញ្ញាបត្រ​គ្រប់គ្រងពាណិជ្ជកម្ម ពីសាកលវិទ្យាល័យជាតិគ្រប់គ្រង។

ហង្ស ពិសិដ្ឋ

លោក ហង្ស ពិសិដ្ឋ បានចូលបម្រើការក្នុងក្រុមហ៊ុន ម៉េងលី ជេ. គួច អេឌ្យូខេសិន នៅដើមឆ្នាំ២០១៨ ជានាយករងផ្នែកប្រតិបត្តិការ។ ក្រោយមក ក្នុងខែមិថុនា ឆ្នាំ២០១៨ គាត់ត្រូវបានដំឡើងតំណែងជាជំនួយការផ្ទាល់ ស្ថាបនិក ប្រធានក្រុមប្រឹក្សាភិបាល និងអគ្គនាយកប្រតិបត្តិ។

មុនពេលចូលបម្រើការនៅក្រុមហ៊ុន ម៉េងលី ជេ. គួច អេឌ្យូខេសិន លោកបានធ្វើការងារមួយចំនួនដូចជា គ្រូបង្រៀនវិទ្យាល័យ សាស្ត្រាចារ្យ អ្នកនិពន្ធ និងបកប្រែ ហើយចុងក្រោយគឺធ្វើការជាប្រធានគ្រប់គ្រងគម្រោង​ស្រាវជ្រាវ តាមដាន និងវាយតម្លៃ នៃអង្គការអន្តរជាតិ និងអង្គការជាតិអស់រយៈពេលប្រាំឆ្នាំ។ លោកក៏បានបោះពុម្ពអត្ថបទ និងរបាយការណ៍ស្រាវជ្រាវអប់រំមួយចំនួនផងដែរ។

លោក ហង្ស ពិសិដ្ឋ បានបញ្ចប់បរិញ្ញាបត្រជាន់ខ្ពស់អប់រំ ជំនាញការគ្រប់គ្រង និងផែនការអប់រំ ពីសាកលវិទ្យាល័យ ភូមិន្ទភ្នំពេញ ក្នុងឆ្នាំ ២០១១។ លោកក៏បានបញ្ចប់សញ្ញាបត្រ គ្រូបង្រៀនកម្រិតឧត្ដម ឯកទេសភាសាខ្មែរ-អង់គ្លេស ពីវិទ្យាស្ថានជាតិអប់រំ ក្នុងឆ្នាំ ២០០៥ និងបរិញ្ញាបត្រ អក្សរសាស្រ្តខ្មែរ ពីសាកលវិទ្យាល័យ ភូមិន្ទភ្នំពេញ ក្នុងឆ្នាំ ២០០៤។ លោកមានជំនាញឯកទេសលើការរៀបចំផែនការអប់រំ ការវិភាគគោលនយោបាយអប់រំ ការតាមដាន និងវាយតម្លៃគម្រោងអប់រំ វិធីសាស្រ្តស្រាវជ្រាវ និងកម្មវិធិកុំព្យូទ័រសម្រាប់ការ​វិភាគទិន្នន័យផងដែរ។

សាយ ភិរម្យ

លោក សាយ ភិរម្យ ជំនួយការផ្ទាល់ស្ថាបនិក ប្រធានក្រុមប្រឹក្សាភិបាល និងអគ្គនាយកប្រតិបត្តិ នៃក្រុមហ៊ុន ម៉េងលី ជេ. គួច អេឌ្យូខេសិន។ ជាមួយមុខតំណែងនេះ លោកសម្របសម្រួលប្រតិបត្តិការមជ្ឈមណ្ឌលភាសា អេ អាយ អាយ និងសាលារៀន អន្តរទ្វីប អាមេរិកាំង ដោយធ្វើការសហការជាមួយប្រធានសាលាទាំងពីរនោះ។ លោកជាអ្នករបាយការណ៍ផ្ទាល់នូវរាល់បញ្ហាទាំងអស់ទៅកាន់ស្ថាបនិក ប្រធានក្រុមប្រឹក្សាភិបាល និងអគ្គនាយកប្រតិបត្តិ។ លើសពីនេះទៅទៀត លោកក៏ជាអ្នកធ្វើការយ៉ាងជិតស្និទ្ធជាមួយមូលនិធិ ម៉េងលី ជេ. គួច ដើម្បីធ្វើកិច្ចការសប្បុរសធម៌សម្រាប់សង្គមជាតិ។

លោក សាយ ភិរម្យ បានចូលបម្រើការងារនៅក្រុមហ៊ុន ម៉េងលី ជេ. គួច អេឌ្យូខេសិន នៅថ្ងៃទី០២ ខែមិថុនា ឆ្នាំ២០១៤ ក្នុងតួនាទីជាគ្រូបង្រៀនភាសាអង់គ្លេស នៃមជ្ឈមណ្ឌលភាសា អេ អាយ អាយ។ លោកត្រូវបានគណៈគ្រប់គ្រងក្រុមហ៊ុនដំឡើងតួនាទីទៅជាមន្រ្ដីប្រតិបត្ដិការ នៃក្រុមហ៊ុន ម៉េងលី ជេ. គួច អេឌ្យូខេសិន នៅថ្ងៃទី១៩ ខែធ្នូ ឆ្នាំ២០១៦។ ដោយសារការយកចិត្តទុកដាក់ ស្រឡាញ់ការងារ ការប្តេជ្ញាចិត្ត និងភាពឧស្សាហ៍ព្យាយាមរបស់លោកក្នុងការបំពេញការងារ លោកត្រូវបានគណៈគ្រប់គ្រងក្រុមហ៊ុនដំឡើងតួនាទីជាបន្តបន្ទាប់ដូចជា ពីមន្រ្ដីប្រតិបត្ដិការ ទៅជានាយករងប្រតិបត្តិការ ពីនាយករងប្រតិបត្តិការ ទៅជាអគ្គនាយករងប្រតិបត្តិការ និងផ្លាស់ប្ដូរតួនាទីពីអគ្គនាយករងប្រតិបត្តិការ ទៅជាអគ្គនាយករងអប់រំ។ ដោយសារភាពរីកចម្រើនរបស់ក្រុមហ៊ុន និងមានការផ្លាស់ប្តូររចនាសម្ព័ន្ធក្នុងការគ្រប់គ្រងថ្មីចាំបាច់ទៅតាមសម័យកាលបច្ចុប្បន្ននេះ លោក សាយ ភិរម្យ ត្រូវបានតែងតាំងជាជំនួយការផ្ទាល់ស្ថាបនិក ប្រធានក្រុមប្រឹក្សាភិបាល និងអគ្គនាយកប្រតិបត្តិ។

លោក សាយ ភិរម្យ បានបញ្ចប់ការសិក្សាថ្នាក់បរិញ្ញាបត្រផ្នែកអប់រំ ពីវិទ្យាស្ថានភាសាបរទេស(IFL) លើមុខជំនាញបង្រៀនភាសាអង់គ្លេសជាភាសាបរទេស ឬហៅជាភាសាអង់គ្លេសថា TEFL ក្នុងឆ្នាំ២០១៣។ លោកបានទទួលរង្វាន់ជាគ្រូដែលមានភាពស្មោះត្រង់បំផុត គ្រូនិទ្ទេសល្អ (Grade A) និងត្រូវបានជ្រើសរើសជាប់ជាគ្រូឆ្នើមមួយរូប ក្នុងកំឡុងពេលដែលលោកបង្រៀនភាសាអង់គ្លេស នៅមជ្ឈមណ្ឌលភាសា អេ អាយ អាយ៕

ស្រេង លាភា

កញ្ញា ស្រេង លាភា មានតួនាទីជា​ លេខាធិការប្រតិបត្តិ នៃការិយាល័យស្ថាបនិក ប្រធានក្រុមប្រឹក្សាភិបាល និងអគ្គ​​​នាយកប្រតិបត្តិ នៃក្រុមហ៊ុន ម៉េងលី ជេ. គួច អេឌ្យូខេសិន។ កញ្ញាជាអ្នកដឹកនាំក្រុមលេខាធិការ ក្នុង​ការអនុវត្តប្រតិបត្តិការងារទូទៅក្នុងការិយាល័យស្ថាបនិក ប្រធានក្រុមប្រឹក្សាភិបាល និងអគ្គនាយកប្រតិបត្តិ។ ក្នុងនាមជា​លេខាធិការ​ប្រតិបត្តិ នាងមានតួនាទីសំខាន់ក្នុងការផ្តល់ការជួយគាំទ្រការងាររដ្នបាល និងការងារហិរញ្ញវត្ថុទូទៅដោយផ្ទាល់ដល់ស្ថាបនិក ប្រធានក្រុមប្រឹក្សាភិបាល និងអគ្គនាយកប្រតិបត្តិ ព្រមទាំងក្រុមប្រឹក្សាភិបាល។ នាងធ្វើការយ៉ាងជិតស្និទ្ធជាមួយគណៈគ្រប់គ្រងជាន់ខ្ពស់ និង​ចូលរួម​ក្នុងដំណើរការនៃការសម្រចចិត្តក្នុងកិច្ចការប្រតិបត្តិការរបស់ក្រុមហ៊ុន​។ ដោយហេតុនេះ នាងដើរតួនាទីយ៉ាងសំខាន់ ក្នុងការចូលរួម​ចំណែក​ដើម្បីជំរុញ​ការជោគជ័យនៃប្រតិបត្តិការទូទៅរបស់ក្រុមហ៊ុន។

កញ្ញា បានចូលបម្រីការងារក្នុងក្រុមហ៊ុន ម៉េងលី ជេ. គួច អេឌ្យូខេសិន ដែលមានតួនាទីជា ជំនួយការមន្រ្តីរដ្ឋបាល​ ក្នុងខែសីហា​ ឆ្នាំ២០១១។ នៅខែ​មេសា ឆ្នាំ២០១៣ នាងត្រូវបានតំឡើងតួនាទីជា លេខាធិការ ការិយាល័យស្ថាបនិក ប្រធានក្រុមប្រឹក្សាភិបាល និងអគ្គនាយក​ប្រតិបត្តិ ហើយនៅក្នុងឆ្នាំដដែល នាងក៏ត្រូវបានតំឡើងតួនាទីជា លេខាធិការប្រតិបត្តិ ការិយាល័យស្ថាបនិក ប្រធានក្រុមប្រឹក្សាភិបាល និងអគ្គនាយកប្រតិបត្តិ។

កញ្ញា ស្រេង លាភា បានបញ្ចប់ការសិក្សានៅសាលកវិទ្យាល័យ ភូមិន្ទនីតិសាស្រ្ត និងវិទ្យាសាស្រ្តសេដ្ឋកិច្ច ក្នុង​ឆ្នាំ២០០៩ ផ្នែកសេដ្ឋកិច្ចអភិវឌ្ឍន៍។ នាងកើត និងធំធាត់ឡើងនៅក្នុងខេត្តបាត់ដំបង និង​បានបញ្ចាប់សញ្ញាបត្រមធ្យមសិក្សា​​ទុតិយ​ភូមិនៅឆ្នាំ២០០៦​ នៅទីនោះផងដែរ។